Stans okkupasjonen av Vest-Sahara!
Vest-Sahara har status som FNs siste uløste kolonispørsmål og blir ofte kalla Afrikas siste koloni. Landet vart frigjort frå spansk kolonistyre i 1975, men vart samme år okkupert av nabolandet Marokko. Etter ein langvarig krig mellom Marokko og den saharawiske frigjeringsrørsla Polisario måtte 160 000 menneske flykte frå Vest-Sahara. Desse har no budd i flyktningeleirar i Algerie i 30 år og er heilt avhengige av bistand frå EU og FN. Denne situasjonen er uholdbar og medfører grove brot på menneskerettane. Changemaker meiner at norske styresmakter bør auke det internasjonale fokuset på Marokko sine overgrep og arbeide for å få ein slutt på den ulovlege okkupasjonen.

Etter våpenkvila i 1991 har FN operasjonen Minurso hatt som mandat å gjennomføre ei folkeavstemning som følge av ein signert avtale mellom Marokko og Polisario. Ingen av forslaga FN har komme med har vorte aksepterte av Marokko. Samtidig støttar ikkje USA og Frankrike saharawiarane sitt krav om sjølvråderett, og det vert lagt lite internasjonalt press på Marokko. Å motarbeide ei folkeavstemning er i strid med folkeretten. Vest-Sahara er medlem av den Afrikanske Union og er anerkjent av cirka 70 land. Gjennom ei internasjonal anerkjenning får spørsmålet om Vest-Sahara aukt status.

Norsk næringsliv speler ei aukande rolle i konflikta ved at dei driv verksemd i det okkuperte området og utnyttar ressursar i Vest-Sahara. UD fraråder slik verksemd, men gjer ingen ting for å hindre det. Derfor er det opp til grasrota å rapportere kva norskeeigde selskap gjer. Norske bedrifter er med på å legitimere okkupasjonen ved å stjele ressursar frå Vest-Sahara og finansiere okkupasjonsmakta Marokko. Ressursutvinning i ikkje-sjølvstyrte område er i strid med FN-Pakten og FNs Havrettskonvensjon.

For å stanse okkupasjonen av Vest Sahara meiner Changemaker at:

-Norge bør anerkjenne den saharawiske demokratiske republikken og arbeide for at andre land også skal gjere det.

-Norge må legge press på Marokko for å gjennomføre ei folkeavstemning om sjølvråderett for Vest-Sahara slik FN har anbefalt sidan 1991.

-Norske selskap umiddelbart må trekke seg ut av Vest-Sahara.