Haustar vindruer og Afrika-kritikk
Bergens Tidende 22.05.2007

Businessen til Kristian Eidesvik (61) går så det susar, bortsett frå vinfarmen i Italia.

- Vingarden er ikkje business, det har aldri vore meininga. Det går rundt, men først og fremst er det morosamt og lærerikt, seier bømlingen som driv sitt Caiano-konsern - oppkalla etter vingarden - frå Haugesund.

Shipping og eigedom - ikkje vin og oliven frå Toscana - er basisen i Eidesviks milliardforretning. No slepp han også neste generasjon til på eigarsida, skriv Haugesunds Avis. Toril (39), Bernt (37), Eivind (32) og Maria (27) har fått fordelt 49 prosent av aksjane likt mellom seg.

- Trappar ikkje ned
- Det betyr ikkje at eg trappar ned. Eg arbeider berre på ein annan måte, seier Kristian Eidesvik, som blant anna eig Wilson-reiarlaget (81 prosent), In-Ship og fleire hotell i Haugesund og Polen. Chianti-vinen, som han produserer over 20.000 flasker av årleg, er i sal både på Vinmonopolet og Eidesvik sine hotell.

Konsernet sysselset over 1900 menneske, og fekk eit overskot på 358 millionar kroner i 2006.

Eidesviks investering i fiskeriselskapet Sjøvik AS - som fiskar utanfor det marokkansk okkuperte Vest-Sahara - valdar 61-åringen framleis ingen store kvaler, trass politiske protestar.

- Politikarar snakkar
- Nei, dessverre. Eg har vore der nede ein gong, eg eig berre ein part i samarbeidsselskapet, som er registrert i Marokko. Eg har veldig godt samvit. Norske politikarar som snakkar om dette, har ikkje sett seg inn i forholda, seier Kristian Eidesvik, med fortid som Frp-politikar i Bømlo kommune og Hordaland fylkesting.

- Pengane går direkte til Marokko. Det er tjuveri av Vest-Sahara sine ressursar, har Aminatou Haidar (40), menneskerettsforkjempar frå Vest-Sahara uttalt til Bergens Tidende.

- Er Wilson-båtane engasjert i prosjektet?

- Nei, dei har i tilfelle berre vore innom for å frakta fisk til Europa eller andre marknader, seier Eidesvik.

VINPRODUSENT: Kristian Eidesvik produserer over 20.000 flasker Chianti-vin årleg. Den er i sal både på Vinmonopolet og Eidesvik sine hotell.